Куманово, 27 јули 2023 (МИА) - Жителите од Оризаре велат дека не се виновни зошто заради други проблеми немаат електрична енергија. Тие бараат да се одвојат со други електрични столбови за да не имаат проблеми.

-Шеесет и две  години имам и досега немам видено вакво нешто, дојдовме да најдеме заедничко решение, вели жител на Оризаре.

Дел од нив пак велат дека немаат ништо со Слупчане, и бараат од ЕВН да им се реши нивното прашање и проблемот со електрична енергија за која велат дека си ја плаќаат. Бараат од компанијата да најде начин и дистрибуцијата до нивното село оди преку други села, а не преку Слупчане. Жителите кажаа дека мирно ќе протестираат сè додека не им се реши проблемот во нивното село.

Откако групата жители на липковското село Оризаре, влегоа во објектот на КЕЦ Куманово, вработените ги напуштија работните места од безбедносни причини и непостоење на услови за работа, информираа денеска од ЕВН. Од компанијата велат корисничко енерго - центар на ЕВН Куманово нема да работи сè додека не се создадат услови за нормално одвивање на работата.

Инаку, како што претходно информираа од ЕВН, жителите на Оризаре немаат струја, откако жителите од нивното соседно село Слупчане бесправно манипулираа со трафостаниците, оставајќи го нивното и соседните села без струја.

Утрово, ЕВН информираше дека селото Слупчане и Оризари (општина Липково) се сè уште без напојување со електрична енергија. Останатите дефекти беа надминати. Од компанијата велат дека сè додека не се создадат нормални услови за работа и се загарантира сигурноста на вработените на електродистрибуција, нема да работат на санација на дефекти или да извршуваат редовни работни активности во овие села.

Од Министерството за економија ги повика граѓаните во државата редовно да си ги намируваат обврските кои ги имаат кон енергетските компании. ам/дма/

Фото: МИА