Вашингтон, 12 јули 2024 (МИА) - Унгарскиот премиер Виктор Орбан се сретна со поранешниот американски претседател Доналд Трамп, кој се бори за реизбор.

Тие разговарале за „можностите за мир“ во Украина, изјави портпаролот на Орбан.

Средбата се одржа во имотот на Трамп, Мар-а-Лаго во Флорида. Според неговиот портпарол, тоа била следната станица на „мировната мисија“ на Орбан.

По средбата со Трамп во комплексот Мар-а-Лаго покрај плажата на поранешниот претседател, Орбан сподели фотографија од нив двајца на социјалните мрежи со натпис: „Разговаравме за начините за постигнување мир. Добрата вест на денот: тој ќе го реши тоа!“

На сопствената страница на социјалните мрежи, Трамп објави: „Ти благодарам Виктор. Мора да има МИР, и тоа брзо“.

Унгарскиот лидер, кој е долгогодишен поддржувач на Трамп, во изминатите две недели имаше ненадејни посети на Киев, Москва и Пекинг во самопрогласената „мисија на мирот“ што ги налути сојузниците во НАТО. Неговата средба во Москва со рускиот претседател Владимир Путин особено налути одредени членки на НАТО, кои рекоа дека патувањето го легитимирало Путин во време кога Западот се обидува да го изолира поради неговата војна во Украина.

Орбан отпатува за Киев пред неговата посета на Москва, но не му кажал на украинскиот претседател Володимир Зеленски за неговата мисија во Русија. Советникот за национална безбедност на Белата куќа, Џејк Саливан, на прашањето за иницијативата на Орбан, рече дека Украина би била во право да биде вознемирена од секој обид да се преговара за мировен договор без учество на Киев. ссм/

фото: кабинет на Виктор Орбан на Икс