Скопје, 18 јануари 2023 (МИА) – Во наредниот период, Секторот за инспекциски работи на Општина Центар ќе започне со засилени инспекциски контроли на застаклените тераси на рестораните, кафе баровите и останатите локали, најавуваат од Општината.

Акцијата, велат, ќе ги опфати сите нелегално изградени и застаклени тераси пред и околу локалите, кои не поседуваат одобрение за поставување урбана опрема и друга соодветна документација за нив.

-Со оваа активност започнуваме да воведуваме ред во начинот на поставување и одржување на летните тераси на кафеаните, рестораните, кафе баровите и другите локали кои вршат дејност на подрачјето на Општина Центар. Целта е да се отвори просторот и да се ослободат јавните површини и да не им пречат на граѓаните, затоа што јавниот простор е наше заедничко добро, изјави градоначалникот на Општина Центар, Горан Герасимовски.

Во деновите што следат активна ќе биде и градежната инспекција, која ќе врши надзор на изградените доградби на објектите и ќе ги санкционира сите објекти кои се спротивни на Програмата за поставување на урбана опрема на подрачјето на Општина Центар.

По вчерашното отстранување на доградбата на бутик на улица „Македонија“, градоначалникот Герасимовски посочи дека нема да има толеранција за нелегални објекти на во Општина Центар.

Општина Центар повторно апелира до сите инвеститори и сопственици на објекти и доградби да ја поседуваат целосната документација и да ја имаат подмирено комуналната такса. Во спротивно, општината ќе ги санкционира, а доколку е потребно и ќе ги отстрани нелегалните доградби, со што трошокот за отстранување ќе падне на товар на сопствениците на објектите. сст/лв/