11 ноември 2024

Скопје - Претседателката на државата Гордана Сиљановска Давкова престојува во Баку, Република Азербејџан, по повод учеството на Светскиот лидерски самит за акција во рамки на 29. Конференција на страните на Конвенцијата на Обединетите Нации за климатски промени – КОП29.

Во рамки на учеството на самитот, претседателката Сиљановска Давкова, како што денеска соопштија од нејзиниот Кабинет, ќе се обрати на првата пленарна сесија и предвидено е да оствари повеќе билатерални средби со шефови на држави и влади, како и средби со претставници на меѓународни организации.

Во состав на македонската државна делегација што ја предводи претседателката Сиљановска Давкова, се заменик претседателот на Владата и министер за животна средина и просторно планирање, Изет Меџити и министерката за енергетика, рударство и минерални суровини, Сања Божиновска. 

Скопје - Народната банка ги потсетува младите истражувачи дека е распишан Конкурсот за Годишната награда за најдобар труд од областа на макроекономијата и банките и банкарските системи. Крајниот рок за доставување на трудовите за Конкурсот за Годишната награда за 2025 година е 1 февруари 2025 година. Сите заинтересирани млади истражувачи можат да поднесат свој труд, во согласност со условите и критериумите на јавниот повик. 

Право на учество имаат сите државјани на земјава на возраст до 35 години, кои не се вработени во Народната банка и не се членови на Советот. Авторите имаат право да конкурираат на Конкурсот за избор на најдобар труд и со труд што веќе бил објавен, но не пред 1 јануари 2023 година. Трудовите се поднесуваат до Народната банка по електронски пат на е-адресата: konkurs@nbrm.mk .

Лима - Претседателот на Македонската традиционална карате федерација, Дејан Недев денес е одликуван со посебно признание од страна на организаторот на Светскиот ИТКФ шампионат и претседател на Перуанската федерација за традиционално карате, г-Дин Џилермо Де Витори, за придонес и развој на традиционалното карате во Перу и Јужна Америка. 

- Тој исто така се заблагодари за учеството на Македонија на СШ во Перу и изрази подготвеност за продлабочување и понатамошна соработка помеѓу Македонија и Перу. Го покани Недев наредната година да одржи карате семинар во Лима, Перу, информираат од МТКФ.

Брисел - Специјалниот пратеник на ЕУ за дијалог меѓу Белград и Приштина, Мирослав Лајчак, најави дека оваа недела ќе биде целосно фокусиран на следење на постигнатиот договор на последната средба на главните преговарачи во Брисел.

-За да се вратам на мојата главна област на работа, ќе ја започнам мојата недела во Женева со важни дискусии за Западен Балкан. Оваа недела исто така ќе биде целосно фокусирана на следење на тоа што беше договорено за време на нашиот последен состанок на главните преговарачи, напиша Лајчак на Фејсбук.

Амстердам - НАТО продолжува да има воена предност во однос на Русија, и покрај повторното вооружување под претседателот Владимир Путин, според студијата објавена денеска, нарачана од Гринпис (Greenpeace).

-Анализата на воените способности на западната алијанса и Русија „не остава сомнеж за севкупната воена надмоќ на НАТО, двете страни имаат паритет само во однос на нуклеарното оружје“, заклучија Херберт Вулф и Кристофер Штајнмец, автори на студијата.

За целите на студијата, Вулф и Штајнмец го споредија воениот потенцијал на НАТО и Русија врз основа на шест централни параметри, вклучувајќи ги и воените трошоци.

Киев – Ниту еден руски проектил денеска не стигна до Украина, откако украинските воздухопловни сили прогласија тревога поради големиот број бомбардери кои полетале од руска територија првпат по повеќе од два месеца.

Украинската војска очекуваше масовен руски напад, а Украина превентивно ја прекина струјата и ги повика жителите да отидат во засолништата.

Лондон – На денешната средба во Париз помеѓу претседателот на Франција, Емануел Макрон и британскиот премиер Кир Стармер ќе се разговара за можноста да го убедат претседателот во заминување на САД, Џо Бајден да и дозволи на Украина да лансира ракети „Сторм шедоу“ (Storm shadow) врз Русија, објави британскиот весник Телеграф.

Неименувани извори од британската Влада за Телеграф изјавија дека се надеваат оти Бајден конечно ќе даде одобрение, кое Киев го бара со месеци.

Новоизбраниот претседател на САД, Доналд Трамп за време на кампањата ветуваше завршување на војната во Украина во рок од 24 часа по преземањето на функцијата.

Moсква - Кремљ го демантираше извештајот на американски медиуми дека рускиот претседател Владимир Путин и новоизбраниот претседател на САД Доналд Трамп разговарале по телефон минатата недела за конфликтот во Украина. 
Портпаролот на Кремљ, Дмитриј Песков, изјави дека извештаите за тоа се „целосно лажна информација“, негирајќи дека имало каков било телефонски повик.

„Вашингтон пост“ во неделата објави дека Трамп телефонски разговарал во четвртокот со Путин, нагласувајќи му да не го разгорува конфликтот. 

Вашингтон - Американскиот милијардер Илон Маск најверојатно нема да биде во идната администрација на Доналд Трамп, а во исто време расте неговото влијание врз новоизбраниот претседател на Соединетите Американски Држави, објави денеска Си-Ен-Ен, повикувајќи се на повеќе извори. 

Американскиот ТВ канал потсетува дека на Маск јавно му било понудено да раководи со комисијата за ефикасност за намалување на трошоците во американската сојузна влада.

Техеран – Иран денеска побара од новоизбраниот претседател на САД, Доналд Трамп да стави крај на војната во Појасот Газа, каде главниот непријател на исламската република Израел се бори со Хамас повеќе од една година.

- Идниот американски претседател треба да го запре континуираниот геноцид во Појасот Газа, изјави портпаролот на иранското Министерството за надворешни работи, Есмаил Багаи. 

Токио - Шигеру Ишиба денеска и официјално беше реизбран за премиер на Јапонија по вториот круг гласање во Парламентот во кој неговата владејачка коалиција повеќе нема мнозинство.

Се очекуваше Ишиба да остане на функцијата, бидејќи неговата Либерално-демократска партија (ЛДП) и нејзиниот коалициски партнер Комеjто имаат најголем број места во парламентот, иако не освоија мнозинство на парламентарните избори одржани на 27 октомври. Ишиба ќе може да формира малцинска влада.

Рим - Високопреработената храна, како што се грицки, зашеќерени напитоци, индустриски леб, овошен јогурт, житарки и алтернативи за месо - сѐ тоа е поврзано со забрзаното биолошко стареење. Тоа, поради високата содржина на калории, шеќер, масти и сол во намирниците, посочува ново истражување на Медитеранскиот невролошки институт „Неуромед“ во Поцили, Италија.

Манчестер - Американската поп-ѕвезда Тејлор Свифт вчеравечер триумфираше на доделувањето на Европските „Ем-ти-ви“ музички награди во Манчестер, В. Британија, со четири добиени одличја.

Пејачката која се движи кон средината на четвртото десетлетие од својот живот, не беше присутна на доделувањето. Таа ги доби признанијата во битните категории - „уметник на годината“, „најдобар акт во живо“ и „најдобро видео“ за песната „Fortnight“. Таа, исто така, победи и во категоријата за најдобар американски уметник.

Во однапред снимена порака, Свифт се извини што не можела да присуствува на доделувањето.

Лос Анџелес - Американската глумица-пејачка Џенифер Лопез во саботата присуствуваше на премиерата на филмот „Злобна“ (Wicked) во Лос Анџелес, каде што воодушеви со својата облека.

Таа повторно се покажа во вистинско модно светло, облечена во тоалета на модниот дизајнер Зухаир Мурад. Фустанот со светкав преклоп го дополни со дијамантни сандали со отворени пети, нараквици со бисери и едноставна чанта, но и полабава пунџа и два прамени близу лицето.