Рим, 6 јануари 2022 (МИА) - Италија ја прави вакцинацијата задолжителна за сите постари од 50 години од 15 февруари, во обид да се бори со енормно зголемениот број нови инфекции со коронавирусот.

Бразил одобри вакцини за деца на возраст од пет до 11 години бидејќи најнаселената земја во Јужна Америка се соочува со брзо зголемување на инфекциите поради празничните собири. Изборните собири се откажани во најнаселената држава во Индија, Утар Прадеш, поради исклучително голем број новозаразени со сојот Омикрон, при што инфекциите се зголемија речиси тројно за два дена.

Кинеските власти ги казнија официјалните лица откако се појавија вирални снимки од бремена жена која имала спонтан абортус во затворениот град Ксиан откако болницата го одбила нејзиниот влез без тест за Ковид.

Макао ги забранува сите влезни патнички летови надвор од Кина на две недели, откако беа откриени три случаи на вируси кај патници кои пристигнуваат од странство.

Јапонскиот министер за надворешни работи Јошимаса Хајаши ги повика САД да го ограничат движењето на американските војници во земјата по зголемениот број случаи во базите и околните заедници.

Австралија вети дека ќе го депортира светскиот тениски рекет број еден Новак Ѓоковиќ, откако тој не ги исполни строгите услови за влез. Србинот, кој е скептик за вакцините, дојде таму за да ја одбрани својата „круна“ на Австралија опен.

Ѕвездата на Арсенал, Пјер-Емерик Обамејанг е позитивен само неколку дена пред првиот натпревар на Габон во Африканскиот куп на нации.

Музичките награди Греми што треба да се одржат на 31 јануари се одложени, а филмскиот фестивал Санденс исто така оди на интернет поради ширењето на Омикрон во САД.

Откако се појави епидемијата во Кина во декември 2019 година, од коронавирус починаа најмалку 5.463.970 луѓе. САД имаат забележано најмногу смртни случаи од Ковид со 832.148, потоа Бразил со 619.513, Индија 482.876 и Русија 313.817.

Земајќи го предвид вишокот на смртност поврзана со Ковид-19, Светската здравствена организација проценува дека вкупниот број смртни случаи може да биде два до три пати поголем. паг/