Дебар, 1 април 2025 (МИА) - Совет за превенција на општина Дебар, под раководство на градоначалникот Хекуран Дука, на посебна седница, разгледа повеќе прашања поврзани со безбедноста и управувањето со вонредни ситуации во случај на несреќи.

Претставниците од релевантните институции информираа за актуелната состојба, со посебен фокус на хотелите, рестораните и јавните институции, училиштата, детската градинка и колективните станбени единици.

-На средбата претставници од локалната власт, од релевантните институции, како УЈП, ОВР, ТППЕ, ЦУК, ДЗС, директорите на училиштата и детската градинка, направија преглед на актуелната состојба, по контролите извршени во многу објекти. Кај некои се констатирани недостатоци, за што доставени се записници со опомена веднаш да се преземат мерки за нивно отстранување. Во спротивно ќе следуваат законски казни, изјави за МИА, градоначалникот Дука.

Според него во општинската зграда и големата спортска сала не се утврдени недостатоци, кај дел од другите субјекти тие се минимални, како што е по некој неисправен апарат за гаснење пожари, но кај други има поголеми недостатоци.

-Ќе бидеме ригорозни во исполнувањето на законските обврски на секого. Она што се случи во дискотеката „Пулс“ во Кочани, каде животите ги загубија 59 млади, никогаш и никаде да не се повтори. На средбата од име на сите присутни оддадовме почит кон загинатите, испраќаме сочувство до семејствата и посакавме што побрзо целосно закрепнување на повредените, рече Дука.

Исто така, на средбата разгледани биле и други прашања значајни за безбедноста на граѓаните, како што е заштитата од ерозии, кои се јавуваат во пролетниот период поради дождовите, и донесени повеќе конкретни одлуки кои ќе придонесат за подобрување на условите и зголемување на нивото на безбедност. вт/нд/

Фото: Општина Дебар