Атина, 29 октомври 2024 (МИА) – Грчкиот премиерот Киријакос Мицотакис и претседателот на Република Кипар Никос Христодулидис имале телефонски разговор во пресрет на утрешната посетата на Христодулидис на САД и средбата со американскиот претседател Џо Бајден, јави дописничката на МИА од Атина.

Портпаролот на кипарската Влада Константинос Летибиотис на платформата Икс напиша дека „координацијата меѓу Кипар и Грција останува континуирана и блиска“.

Ден по посетата на САД, односно в четврток, кипарскиот претседател во Атина ќе се сретне со грчкиот премиер.

За утрешната средба со американскиот претседател, Христодулидис рече дека поканата доаѓа „во продолжение на важни случувања што го покажуваат зајакнувањето на регионалниот и меѓународен отпечаток на земјата“, нешто за што посочи дека работат методично.

Како што вчера објави МИА, медиумите на Кипар пишуваат дека ова ќе биде прва посета на САД на кипарски претседател по 28 години, со оглед на тоа дека последната била во 1996 година кога тогашниот претседател Главкос Клиридис се сретнал со тогашниот американски претседател Бил Клинтон.

Посетата е една седмица откако во Никозија се одржа првиот стратешки дијалог меѓу Кипар и САД. ср/ссм/