Кочани, 30 септември 2024 (МИА) – Учениците во основните училишта во општина Кочани да добијат унифицирани работни униформи беше предлог-точката на дневниот ред на денешната седница на Советот на Општината, што доби едногласна поддршка од присутните советници.

Во образложението беше нагласено дека иницијативата е на Советот на родители во ОУ „Св. Кирил и Методиј“, кој веќе доставил барање до Општината. Притоа, беше речено дека најголемиот дел од средствата за набавка на униформите треба да се обезбедат од општинскот буџет, а остатокот со донации од бизнис секторот.

- Се работи за благородна намера со ваквиот предлог, но истиот отвора многу повеќе прашања, особено што со ваква одлука ќе се репродуцира потребата истата да остане традиционална и во наредните години. Униформите се трошат и се израснуваат, децата од помалите одделенија, односно првоодделенците веќе во второ и трето одделение не можат да ги носат. Се бараат околу три милиона денари, а за да креираме една таква одлука мораме да имаме и прецизни вредности со кои ќе располагаме или ќе го креираме буџетот за следната година. Нека оди како барање, а мојот совет е да му пристапиме малку посериозно и она што ќе се донесе сега да остане и за наредните Совети и за наредните градоначалници, истакна градоначалникот Љупчо Папазов.

Предлогот наиде на позитивни реакции во општинскиот Совет, при што во дискусиите беше истакнато дека ОУ „Св. Кирил и Методиј“ и ОУ „Крсте П. Мисирков“ од Оризари веќе донеле свои кодекси, со што делумно се спроведува намерата за унифицираност во облекувањето на учениците. та/цр

Фото: МИА