Вашингтон, 7 октомври 2024 (МИА) - САД воведоа нови санкции за меѓународната мрежа за собирање средства за палестинското движење Хамас, обвинувајќи ја дека игра голема улога во надворешното финансирање на групата. Одлуката на Вашингтон е донесена во врска со првата годишнина од почетокот на војната во Газа.

Американското Министерство за финансии објави дека воведува санкции за три лица и добротворна организација обвинета дека е главен финансиски поддржувач на Хамас, како и банката Ал Интај во Газа, за која се верува дека е контролирана од групата.

„Додека ја одбележуваме првата годишнина од бруталниот терористички напад на Хамас, Министерството за финансии ќе продолжи неуморно да ја ослабува способноста на Хамас и другите дестабилизирачки ирански полномошници да ги финансираат своите операции и да вршат нови акти на насилство“, изјави министерката за финансии Џенет Јелен.

„Министерството ќе ги искористи сите расположливи алатки за да побара одговорност од Хамас и оние кои ги олеснуваат нивните активности, вклучително и оние кои се обидуваат да ја искористат ситуацијата за да добијат дополнителни извори на средства“, додаде таа.

Според неа, „Хамас го користи страдањето во Газа за да собира средства преку фиктивни добротворни организации кои лажно тврдат дека им помагаат на цивилите во Газа“.

Јелен рече дека на почетокот на оваа година групата можеби добивала 10 милиони месечно од таквите донации. паг/

Фото: МИА архива