Вевчани, 6 јуни 2024 (МИА) - Општина Вевчани објави јавен повик за формирање иницијативен одбор за конституирање локално собрание за млади со цел да се консултираат младите и да се застапат нивните интереси во креирањето на Локалниот младински совет.

Според Јавниот повик, иницијативниот одбор треба да е составен од пет членови, чија функција е да го формираат Локалното собрание за млади.

- Улога и задачи на иницијативниот одбор се: поддршка на Општината во креирањето или ревидирањето на актите и одлуките кои го уредуваат формирањето и работата на Локален младински совет, распишување повик за конститутивното локално собрание на млади во согласност со статутот на Општината по принципот на јавност и транспарентност и соработка со Општината при организација и одржување на конститутивното локално собрание за млади, стои во повикот.

Во иницијативниот одбор, како што е наведено, може да членуваат младински организации, организации за млади, политички подмладоци, ученички и студентски организации и други облици на младинско здружување, кои работат и функционираат на територијата на општина Вевчани и сакаат да учествуваат во основањето на Советот. сс/мд/

Фото: МИА архива