Киев, 20 септември 2024 (МИА) - ЕУ ќе и одобри заем до 35 милијарди евра на Украина со цел да и помогне на оваа земја заглавена во тешка војна со Русија, објави денеска претседателката на Европската комисија, Урсула фон дер Лајен.

Заемот, што беше најавен за време на посетата на шефицата на Комисијата на Киев, е дел од поширокиот план на земјите од Г7 за собирање средства со користење на приходите од руските средства замрзнати за да се санкционира Русија поради инвазијата.

„Немилосрдните руски напади значат дека на Украина и е потребна континуирана поддршка од ЕУ“, наведе Фон дер Лајен во објавата на X.

Украина се соочува со огромни финансиски потреби по повеќе од две години интензивна војна која ја уништи нејзината инфраструктура.

Русија исфрли од погон околу девет гигавати (GW) од енергетската инфраструктура на Украина.

Г-7 замрзна руски финансиски средства во вредност од околу 300 милијарди долари кратко време по инвазијата на Москва врз Украина во 2022 година. Тие ветија дека ќе ги искористат овие средства за да му помогнат на својот сојузник, но поминаа месеци дебатирајќи точно како може да функционира таков механизам .

ЕУ во мај склучи договор меѓу земјите членки според кој 90 отсто од тие приходи ќе одат во фонд управуван од ЕУ за воена помош за Украина, додека останатите 10 отсто ќе го поддржат Киев на други начини.сд/

фото:ЕПА