Учениците од Охрид во еко-акција, исчистени плажи во рамки на проектот „Чиста животна средина за светла иднина“
- Ученици од охридското основно училиште „Григор Прличев“ деновиве спроведоа неколку еко-акции за чистење на крајбрежјето на Охридското Езеро, како дел од проектот „Чиста животна средина за сцветла иднина“ што го реализира Здружението на граѓани „Нова Порта“ со поддршка на Министерството за животна средина и просторно планирање.
![Учениците од Охрид во еко-акција, исчистени плажи во рамки на проектот „Чиста животна средина за светла иднина“](https://new.mia.mk/images/20240528094643_big_730x400_92.webp )
Охрид, 28 мај 2024 (МИА) – Ученици од охридското основно училиште „Григор Прличев“ деновиве спроведоа неколку еко-акции за чистење на крајбрежјето на Охридското Езеро, како дел од проектот „Чиста животна средина за сцветла иднина“ што го реализира Здружението на граѓани „Нова Порта“ со поддршка на Министерството за животна средина и просторно планирање.
Целта на овој проект е градење на еколошки свесна младина. Од Здружението на граѓани „Нова порта“ велат дека преку вакви акции за чистење на најкритичните места долж брегот на Охридското Езеро се подигнува еколошката свест кај јавноста, а од друга страна се остава чиста слика пред почетокот на туристичката сезона во Охрид
-Како наставен кадар се трудиме од најмала возраст да ги едуцираме децата за грижа кон животната средина. Би било добро да има повеќе вакви еко акции, да се вклучуваат што повеќе ученици. Ние сме свесни дека не можеме сѐ да исчистиме, но даваме пример како треба да се однесуваме, да бидеме еко свесни. Учениците ги учиме правилно да одлагаат отпад но и да рециклираме отпад, а со тоа веруваме и со вакви акции ќе ја подигнеме свеста кај сите, вели Билјана Иваноска, наставник во ООУ „Григор Прличев“ Охрид.
Младите испратија силни еколошки пораки за зачувување на најстарото и највредното природно езеро во земјава и Европа.
„На отпадот местото му е во корпа“, „Не фрлај ѓубре во Езерото“, „Да ја чуваме животната средина“, се дел од пораките на учениците.
-Интересот кај младите за да се вклучат во акцијата е голем. Изминатиов период на повеќе локации се собираше отпадот а се спроведе и акција под мотото „Езерото не е корпа за отпад“ на која преку транспаренти се испратија еколошки пораки за заштита на Охридското Езеро. Целта пред сѐ е подобрување на состојбата на животната средина и подигнување на свеста за зголемена заштита на Охридското Езеро и крајбрежјето , велат од „Нова порта“.
Исчистените плажи, како еколошко чисти плажи, ќе бидат обележани со еко-знамиња.
-Ваквите акции пред се имаат едукативна намена, а практичните примери се најважни во борбата за заштита на животната средина, додаваат од „Нова порта“.
Во рамките на проектот предвидено е да се реализираат и неколку подводни чистења на езерото кај Охрид и Струга, како и едукативни работилници со учениците од основните училишта.
За подигнување на еколошката свест во рамките на проектот ќе биде изработен и видео-спот преку кој младите ќе испратат силни и јасни пораки за здрава и чиста животна средина. аб/дма/
фото:„Нова Порта“