Скопје, 26 јуни 2023

Координаторот Никола Мицевски и пратеници од ПГ на ВМРО-ДПМНЕ во Собранието, денеска остварија средба со заменик претседателот на полскиот Сејм, Ришалд Терлецски, кој ја предводи делегацијата која е во посета на Скопје.

Мицевски и Терлецски, на средбата, разменија мислења околу процесите за пристапување на земјава во Европската Унија, во контекст на новите геополитики околности.

Мицевски посочи дека членството во НАТО е завршен процес, за што, како што нагласи, и ВМРО-ДПМНЕ даде значителен придонес со донесување на повеќе закони од областа на безбедноста и правосудството, за кои беше потребен консензус.

Мицевски рече и дека ВМРО-ДПМНЕ, како најголема опозициска партија, во однос на надминувањето на спорот со Бугарија досега дала четири предлози кои се во насока на заштита на идентитетот и обезбедување на интеграција, кои, како што наведе, не биле земени предвид и се уште нема одговор за нив.

За нас ЕУ, рече Мицевски, и натаму претставува цел кон која стреми и нашата земја. Очекуваме, додаде тој, реализација на оваа цел преку јасни стандарди и принципи и преку почитување на Копенхашките критериуми.

Терлецски, пак, истакна дека Полска е поддржувач на проширувањето на Унијата, посебно со земјите кои ги смета за слични од различни аспекти, меѓу кои е и нашата земја.

Ние, рече Терлецски, и натаму ја сметаме ЕУ за многу добар проект, кон кој пристапивме во 2004 година. Тој посочи дека сега се сменети многу околности, ама, како што нагласи, за земјите и натаму е полесно да ги решаваат споровите кога се внатре во Унијата, отколку надвор од неа.

фото: ВМРО-ДПМНЕ

Центар за комуникации со јавноста на ВМРО-ДПМНЕ

___________________________________________________________________________

 МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.