Скопје, 14 октомври 2024 (МИА) - Во Народната банка, во рамки на соработката со Царинската управа, обучувачи од Дирекцијата за трезорско работење одржале обука за царински работници за препознавање сомнителни пари и за справување со нив.

- Преку постојано зајакнување на капацитетите на институциите, Народната банка го јакне системот за справување со фалсификуваните пари. Имајќи предвид дека јавните службеници, вршејќи ја својата должност, секојдневно доаѓаат во контакт со книжни и ковани пари и се првата бариера во заштитата на интегритетот на парите, нивното обучување за воочување сомнителни примероци, за нивно отстранување и за доставување до Народната банка е суштинско во борбата против фалсификатите, соопштија денеска од Народната банка.

Како препорака од твининг-проектот „Јакнење на капацитетите на системот за борба против фалсификување евра“, се посочува во соопштението, Народната банка започнала да организира обуки за претставници од институциите вклучени во системот за справување со фалсификување пари, односно од Министерството за внатрешни работи, Царинската управа, Јавното обвинителство и од Финансиската полиција. Исто така, редовно се организираат задолжителни обуки за запознавање со заштитните елементи на домашните и на странските валути за вработените во банките и центрите за готовина. Само минатата година низ обуките поминаа повеќе од 200 професионалци. 

Од Народната банка подвлекуваат дека се единствената овластена институција за утврдување на автентичноста на книжните и кованите денари и странски валути.

- Во изминатиот период, засилено се врши и размена на податоци со националните и меѓународните институции за спроведување техничка анализа и откривање фалсификувани пари, стои во соопштението. цр/дма/

Фото: Народна банка