Брисел, 16 јули 2025 (МИА) - Министерот за европски прашања Орхан Муртезани утре во Брисел ќе учествува на Форум на високо ниво за проширувањето на ЕУ, насловен „Градење инклузивна иднина во проширена ЕУ: Улогата на социјалниот дијалог, граѓанското општество и вклученоста на младите“. 

На форумот, кој е во организација на Европскиот економско-социјален комитет (ЕЕСК), Муртезани ќе учествува на воведната сесија на собирот, заедно со претседателот на ЕЕСК, Оливер Ропке, црногорската министерка за европски прашања Мајда Горчевиќ и шпанскиот државен секретар за Европска Унија, Фернандо Сампедро.  

Форумот има за цел да ја истакне важноста на социјалниот дијалог и ангажманот на граѓанските организации и младите во процесот на проширување на Европската Унија, како основа за градење поправедно и посолидарно европско општество. сп/са/

Фото: МИА Архива