26 март 2025

Охрид - Советот на Општина Охрид денеска на вонредна седница донесе одлука за одобрување финансиска помош во износ од милион денари за семејствата на настраданите и повредените лица во пожарот во Кочани.

Како што појасни градоначалникот Кирил Пецаков, во издвоените средства е вклучена и сумата што беше наменета за традиционалната Ифтарска вечера која поради трагичниот настан во Кочани оваа година нема да се организира.

Скопје - „Минатата недела остварив средба со директорките за да ги увидиме сите работи во училиштата. Тие се на високо ниво. Минатата година, Црвениот крст направи обуки за евакуација на наставниот и стручниот кадар, а сега дополнително се прават обуки и за евакуација на учениците. Проверени се сите хидранти, ПП апарати, дополнително и електричната инсталација во самите училишта со цел нашите деца да бидат што побезбедни. Можат да бидат спокојни родителите, затоа што грижата е на највисоко ниво и самата безбедност во нашите училишта и градинки “. Ова го потенцираше градоначалникот на Општина Центар Горан Герасимовски во утринската емисија „Ја сакам Македонија“ на телевизија Сител.

Герасимовски истакна дека сите заеднички мора да придонесеме за системот да функционира. 

Кавадарци - Тимот на јавната здравствена установа Општа болница Кавадарци денеска  изрази благодарност до општествено одговорната компанија ,,Alliance one", за донацијата од два ЕКГ апарата, осум антидекубитални пневматски душеци и два пулсоксиметра. 

- Со оваа донација значително се подобруваат условите за работа во нашата здравствена установа, а на пациентите им се овозможува подобра и поквалитетна здравствена заштита. Нашата здравствена установа уште еднаш покажа дека континуирано ги подобрува здравствени услуги што се резултат на модернизирање на медицинската опрема, соопшти тимот на Општа болница со проширена дејност Кавадарци, преку објава на нивната официјална фејсбук страница.

Кавадарци - Се чисти коритото на Овчка Река во селото Марена, информираа денеска од кабинетот на кавадаречкиот градоначалник Митко Јанчев. 

- По барање на жителите на село Марена, во соработка со инспекциските служби од Општина Кавадарци, вчера и денеска се врши чистење на речното корито на Овчка Река со неколку помали диви депонии во околината. Се работи со механизација багер и кипер од ЈА-МИ и два камиона – кипери од Ј.П. Комуналец Кавадарци, соопштија од градоначалничкиот кабинет.

Скопје - Без струја денеска од 9:00 до 13:00 часот ќе бидат дел од жителите лоцирани на улица „Врполе“ во населба Лисиче, општина Аеродром.

Во периодот од 9:00 до 14:00 часот без струја ќе останат корисниците од улицата „Драгиша Мишовиќ“ бр.12/34, а од 9:00 до 15:00 часот дел од корисниците од улиците „Дрезденска“, „Римска“ и „Анкарска“ во општина Карпош.

Скопје - Без вода денеска од 9:00 часот ќе останат дел од корисниците од улиците „Његошева“, „Бриселска“, „Софиска“, „Стокхолмска“, „Петар Драганов“, „Гаврил Лесновски“ и „Копенхагенска“ во Општина Карпош.

Како што соопшти ЈП „Водовод и канализација“ - Скопје, прекинот е поради водоводен приклучок од ф-100 милиметри на улица „Петар Драганов“ бр. 1б.