Скопје, 27 јуни 2024 (МИА) - Министерот за животна средина и просторно планирање и прв заменик на претседателот на Владата и на Република Северна Македонија, Изет Меџити денеска се сретна со амбасадорката на САД во нашата држава Ангела Агелер при што истакнал дека евроатлантската определба и полноправното членство во Европската Унија остануваат врвен приоритет.

Како што соопштуваат од партијата Демократско движење, чиј лидер е Меџити, на средбата, министерот истакнувајќи ги клучните приоритети и стратешки определби на новата Влада, воедно упатил уверување до амбасадорката Агелер дека како владеачко мнозинство, Владата останува и понатаму максимално посветена на продлабочување на меѓусебните односи со најголемиот стратешки партнер и силен сојузник – Соединетите Американски Држави.

-Како прв Заменик на Претседателот на Владата на средбата, Меџити изрази искрена благодарност за поддршката и безрезервната помош што САД во континуитет ја пружаат во насока на реформирање на институциите и зацврстување на демократските капацитети и демократскиот амбиент во нашата држава. Заеднички беше ставот дека се потребни резултати во борбата против политичката корупција која е навлезена длабоко во порите на многу институции. Испораката на правдата мора да биде неселективна и согласно највисоките стандарди на владеење на правото. За да се случи ова, потребни се реформи во правосудниот систем и Владата е решителна оваа борба да ја спроведе до крај, стои во соопштението.

Двете страни, се посочува, се согласиле дека прашањето на политичкиот легитимитет на новата Влада е затворено прашање. Периодот што претстои ќе биде искористен за спроведување на успешна транзиција и консолидирање на институциите во државата. Во овој процес, се додава, од исклучително значење е поддршката на меѓународните партнери, пред се` на Соединетите Американски Држави.

-Од позиција на министер за животна средина и просторно планирање Меџити, ја информираше амбасадорката Агелер за клучните приоритети на Министерството во насока на безкомпромисната борба со загадувачите на амбиенталниот воздух, согласно највисоките европски стандарди и во рамки на планот за чист воздух. Тој изрази уверување дека заеднички ќе се посветиме на градење на обновливи извори на енергија кои што ќе обезбедат повисоки еколошки стандарди и дека како млада држава, имаме потреба од добри искуства и споделување и размена на знаења, а дека поддршката и помошта од страна на САД во нашите напори за подобрување на државните политики за обезбедување здрава животна средина е повеќе од добредојдена, се посочува понатаму во соопштението.

Меџити уште еднаш искажал уверување до нашиот стратешки партнер дека високо ги цениме сите досегашни инвестиции од САД, како економски, така и во насока на подигање на капацитетот на институциите и општествениот демократски развој.

-Остануваме сигурен гарант дека Република Северна Македонија ќе остане на стратешкиот курс - истакна Меџити, стои во соопштението од Демократското движење. вг/са/

Фото: Демократско движење