Брисел, 24 февруари 2025 (МИА) - Претседателот на Европскиот совет, Антонио Кошта синоќа во објава на Икс соопшти дека решил да свика специјален Самит на шефовите на држави или влади на членките на ЕУ за 6 март, на кој ќе се разговара за одбраната на Европа и за случувањата поврзани со Украина. 

- Живееме одлучувачки момент за Украина и европската безбедност. Во моите консултации со европските лидери, слушнав заедничка посветеност за исполнување на тие предизвици на ниво на ЕУ: зајакнување на европската одбрана и давање одлучувачки придонес за мирот на нашиот континент и за долгорочната безбедност на Украина, наведе Кошта во објавата. 

Тој додава дека ќе продолжи да работи заедно со претседателка на Европската комисија, Урсула фон дер Лајен и со сите земји членки, со цел „да бидат подготвени да донесат одлуки на 6 март“. 

Следниот редовен Самит на лидерите на земјите членки на ЕУ е закажан за 20 и 21 март во Брисел.   

Инаку, Кошта, Фон дер Лајен и 21 еврокомесар денеска престојуваат во Киев за да ја изразат непоколебливата поддршка на ЕУ за борбата на Украина за независност и слобода на третата години од почетокот на руската инвазија врз земјата. сп/   

Фото: МИА Архива