Кајакарот Љубомир Спасиќ трет на Светското првенство во Саберо, Шпанија
- На првото официјално светско првенство во Мастерс А во Саберо, Шпанија, велешкиот и македонски кајакар, член на Македонската кајакарска репрезентација Љубомир Спасиќ денеска се пласира на третото место и за 0.62 не успеа да го освои второто место, односно за 21.3 секунди не успеа да биде светски шампион.
![Кајакарот Љубомир Спасиќ трет на Светското првенство во Саберо, Шпанија](https://new.mia.mk/images/20240815162204_big_730x400_75.webp )
Велес,15 август 2024 (МИА) - На првото официјално светско првенство во Мастерс А во Саберо, Шпанија, велешкиот и македонски кајакар, член на Македонската кајакарска репрезентација Љубомир Спасиќ денеска се пласира на третото место и за 0.62 не успеа да го освои второто место, односно за 21.3 секунди не успеа да биде светски шампион.
Тој трката ја заврши со време 20:16:34, или за 21:37, послабо време од шампионот Лорен Маритин од Франција и за само 0:62 послабо време од второпласираниот Ксавијер Миралес Пратс од Шпанија. Светското кајак првенство Мастерс А се одржува на реката Рио Есла во Саберо Шпанија од 14 до 18 август.
-Задоволен сум од својот настап на Светското првенство и ако имав шанса за пласман на второто место кое ми побегна за нешто повеќе од пола секунда, ни изјави Спасиќ.
Додека нашите сениори во тимскиот настап во состав Кристијан Лазаров, Благој Гугинов и Александар Златаров завршија на 13-то место.
-Утре веќе ни претстојат настапи во спринт мене и на останатиот дел од македонскиот кајак тим. Имаме класик на 5.9 км и спринт на 300 метра. Класик се вози и тимски и индивидуално, најави Спасиќ.
Во сабота, македонската кајакарска репрезентација составена од четворица кајакари членови на ККК „Арка Борец“ од Велес ќе се натпреваруваат тимски на спринт.ад/фф/
Фото: Македонска кајакарска федерација