Киев, 9 јули 2024 (МИА) - Украинскиот претседател Володимир Зеленски ја критикуваше денеска посетата на индискиот премиер Нарендра Моди на Москва во моментот кога руски ракети ја погодија детската болница во Киев.

Зеленски рече дека посетата е „огромно разочарување и тежок удар за мировните напори“, според Си-Ен-Ен.

Вчера во руски ракетни напади врз Украина загинаа најмалку 41 лице, а 166 беа ранети, соопштија украинските власти. Во Киев погодена е најголемата педијатриска установа во Украина, како и приватно породилиште.

Моди вчера пристигна во дводневна посета на Русија и се сретна со рускиот претседател Владимир Путин во неговата резиденција во Ново-Огариово во близина на Москва. Посетата на индискиот премиер на Русија е прва од почетокот на војната во Украина.

Официјални разговори меѓу Путин и Моди се планирани за денеска во Кремљ. мс/

фото: ЕПА