Брисел, 8 октомври 2024 (МИА) – Партијата „Фламански интерес“ е најпопуларна партија меѓу младите Фламанци вторпат по ред, покажува истражување објавено денеска во списанието Хумо.

Лидерот на партијата Том ван Грикен е исто така најпопуларниот политичар меѓу младите Фламанци, јави белгиската новинска агенција Белга.

Во анкетата на списанието Хумо учествувале 1.000 луѓе на возраст меѓу 16 и 25 години кои живеат во Фландрија. Вкупно 22 отсто, од кои 34 отсто момчиња и 11 отсто девојчиња, изјавиле дека на локалните избори в недела ќе гласаат за екстремно десничарскиот „Фламански интерес“. На второ и трето место се „Социјалистичката партија – поинакви“ и Новата фламанска алијанса со 13 и 12 проценти поддршка. Екстремно левичарската Белгиска работничка партија е во пораст, зголемувајќи ја својата популарност од 4 во 2020 година на 11 проценти сега.

Според весникот, денешната младина е значително понегативна кон миграцијата. Додека секој втор признава дека на Белгија и е потребна миграција за да го одржи својот просперитет, 46 отсто од младите сега веруваат дека Фландрија не треба да прифаќа нови мигранти, што е повеќе од 25 отсто колку што беше во 2020 година.

Дополнително, 46 отсто го сметаат исламот за закана за нивната култура, додека 51 процент веруваат дека мигрантите ги користат придобивките од системот на социјална помош. Тоа е остра разлика од истражувањето во 2020 година, кога тие бројки беа 23 проценти и 32 проценти, соодветно.

Младите се песимисти за својата иднина. Вкупно 47 проценти стравуваат дека до 40-тата година ќе бидат полоши од нивните родители во однос на домувањето. Тие немаат надеж ниту за безбедноста на работното место (39%) и околината (55%). Точно 69 отсто се загрижени за климатските промени, но секој втор верува дека можат да се запрат. јт/