Вашингтон, 6 ноември 2024 (МИА) - Американскиот долар значително зајакна откако стана јасно дека Доналд Трамп ќе биде избран за следен претседател на САД, а биткоинот достигна рекордна вредност, во услови кога инвеститорите очекуваат потенцијални даночни олеснувања, зголемување на тарифите и пораст на инфлацијата во неговиот втор мандат, јави Би-Би-Си.

Вредноста на доларот се зголеми за околу 1,5% во однос на неколку валути, меѓу кои британската фунта, еврото и јапонскиот јен. Во Јапонија, индексот Никеи 225 заврши со раст од 2,6%, додека австралискиот АСХ 200 затвори 0,8% повисоко. Главните американски берзански индекси, меѓу кои и Дау Џонс, S&P 500 и Насдак, покажуваат тренд на отворање со нагол раст, откако претходно забележаа зголемување над 1%.

Трамп претходно изјави дека има за цел САД да стане „глобална престолнина на криптовалутите", додека биткоинот достигна нов рекорд од 75.371,69 долари, надминувајќи го претходниот рекорд.

Илон Маск, кој го поддржа Трамп за време на кампањата, и беше посочен како предлог за надзор на државните расходи, исто така имаше успешна ноќ, во која неговите акции на Тесла забележаа раст од 14% на берзата во Франкфурт.

Експертите, сепак, предупредуваат на можни потреси на финансиските пазари, како резултат на неизвесноста што ја носат економските планови на Трамп.

- Мерките на Трамп би можеле да ја зголемат инфлацијата и да предизвикаат пораст на обврзничките доходи, што ќе го притисне Федералниот резервен систем во намерата да ги намали каматните стапки, изјави Линдзи Џејмс, стратег за инвестиции од Quilter Investors, пренесува Би-Би-Си.

- Неговите трговски политики, особено ветувањето за високи тарифи кон Кина, предизвикуваат загриженост во Азија. Политичкиот аналитичар од Moody’s Analytics, Катарина Ел, истакна дека „засилената протекционистичка платформа на Трамп создава посебен страв во Азија.“

Во меѓувреме, Федералниот резервен систем треба да ја објави најновата одлука за каматните стапки, а на глобално ниво се очекуваат и коментарите од претседателот на ФЕД, Џером Пауел. ссм/

фото: ЕПА