Сиднеј, 27 февруари 2024 (МИА) - Кина - со 274 дипломатско-конзуларни претставништва е најголема дипломатска сила во светот, пред САД, кои имаат 271 амбасада и Турција со дипломатска мрежа од 252 мисии, се наведува во најновиот извештај на Глобалниот индекс на дипломатија на австралискиот институт Лоуви за 2024 година.

„Дипломатијата често се занемарува како мерка за влијание, но таа никогаш не била поважен елемент во управувањето со државата. Индексот на глобалната дипломатија покажува дека владите продолжуваат да инвестираат во дипломатијата за проектирање моќ и остварување на своите интереси“, пишува Рајан Нилам, директор на програмата за јавно мислење и надворешна политика на Институтот во Сиднеј, кој годишно ја рангира дипломатската сила на 66 земји и територии.

Според ова рангирање, на четврто место по бројот на амбасади и конзулати е Јапонија (251), потоа Франција (249), Русија (230), Велика Британија (225), Германија (217), Италија (206), Бразил (205). )…

Иако водството на Пекинг пред Вашингтон е мало, овој „дипломатски барометар“ ги открива напорите на Кина да го прошири своето влијание во услови на геополитичка конкуренција со САД. Нилам потврдува дека рангирањето го покажува континуираното ривалство меѓу САД и Кина, додавајќи дека „геополитичката конкуренција ги стави Азија и Пацификот во фокусот“.

Анализата на распределбата на дипломатско-конзуларните претставништва открива дека Пекинг предводи во земјите од Африка, Источна и Централна Азија и Пацификот, додека Вашингтон, во однос на Кина, има предност во Европа, Северна и Централна Америка и Јужна Азија. Во земјите од Блискиот Исток и Јужна Америка, двете велесили се прилично рамномерно усогласени. ссм/