Скопје, 9 ноември 2024 (МИА) - Општина Центар ја отвори Лига Центар 2024/2025  – училишни спортски игри што ќе го поттикнат спортскиот дух кај учениците од сите осум основни училишта на општината.  Како што информираат денеска од Општина Центар градоначалникот Горан Герасимовски, на свеченото отворање кое се одржало во спортската сала на ООУ „11 Октомври,“ на сите учесници им посакал среќа и одлични резултати во спортските дисциплини: кошарка, ракомет, фудбал, одбојка и шах, информираат од Општина Центар.

На овие спортски игри покажете ги своите вештини, натпреварувајте се и создадете нови пријателства. Секој од вас има потенцијал да биде победник. Давајте се од себе, забавувајте се и запомнете, најважно е да играте со спортски дух, истакнал Герасимовски.

Во чест на роденденот на Општина Центар, биле доделени 41 стипендија за успешни млади спортисти – ученици од основните училишта во општината. Стипендиите се распределени според постигнувањата на учениците и изнесуваат: 10 стипендии во износ од 3,500 денари, 18 стипендии од 3,000 денари и 13 стипендии од 2,500 денари. Овие средства се наменети за поддршка на нивниот спортски развој во дисциплини како ракомет, кошарка, фудбал, одбојка, шах, пливање, карате, гимнастика и скијање.

Лига Центар 2024/2025 ќе трае цела учебна година, со натпревари секоја недела. На крајот од лигата ќе се организира ревијален натпревар за најуспешните екипи, со цел да се истакнат најдобрите постигнувања и тимскиот дух на нашите млади спортисти. сст/

фото Општина Центар