Брисел, 5 септември 2024 (МИА) - Министерот за европски прашања Орхан Муртезани денеска ја продолжува дводневна работна посета на Брисел, во чии рамки ќе има средби со генералниот секретар на Европската служба за надворешни работи (ЕЕАС), Стефано Санино и со генералниот директор на Генералниот директорат за соседство и преговори за проширување на Унијата (ГД НЕАР), Герт Јан Копман.

Покрај со нив, според најавата, Муртезани ќе се сретне и со постојаниот претставник на Унгарија во ЕУ, амбасадорот Балинт Одор, чија земја е актуелен претседавач со Унијата и со претседавачот на Комитетот за правни работи (ЈУРИ) на Европскиот парламент, европратеникот Илхан Ќучук, кој во претходниот парламентарен состав беше известувач на Комитетот за надворешни работи (АФЕТ) за земјава. 

Вчера, на првиот ден од посетата на Брисел, Муртезани се сретна со еврокомесарот за соседска политика и проширување Оливер Вархеји, со директорката за Западен Балкан во ГД НЕАР, Валентина Суперти и со раководителката на Одделот за Албанија и Северна Македонија при ГД НЕАР, Сигрит Бретел со кои разговараше за тековниот евроинтегративен процес на земјата, чекорите што претстојат за понатамошен напредок, како и имплементацијата на Планот за раст за Западниот Балкан на Европската комисија и поврзаната со него Реформска агенда. сп/мд/

Фото: МИА Архива