26 shtator 2024

Hina/AFP

Shkëmbimi i pamëshirshëm i zjarrit midis Izraelit dhe Hezbollahut të Libanit në ditët e fundit ka nxitur frikën se armiqtë e vjetër po lëvizin në mënyrë të pashmangshme drejt një lufte gjithëpërfshirëse, pavarësisht thirrjeve ndërkombëtare për përmbajtje. Korrespondentët e AFP-së në Jerusalem dhe Bejrut folën me zyrtarë dhe analistë për sulmet në rritje nga palët kundërshtare dhe mënyrat e mundshme për të dalë nga situata.

Izraeli

Zyrtarët izraelitë këmbëngulin se nuk kanë zgjidhje tjetër veçse t'i përgjigjen Hezbollahut pasi sulmet pothuajse të përditshme me raketa kanë boshatisur lagjet pranë kufirit libanez. "Lëvizjet e Hezbollahut e kanë kthyer Libanin jugor në një fushë beteje," tha një zyrtar ushtarak në një konferencë të hënën.

Qëllimet e operacionit të fundit të Izraelit janë të "zvogëlojë" kërcënimin e Hezbollahut, të largojë luftëtarët e grupit nga kufiri dhe të shkatërrojë infrastrukturën e ndërtuar nga njësia elitare Raduan, tha zyrtari ushtarak, i cili kërkoi të mbetet anonim.

Analisti politik izraelit Majkëll Horovic tha se kryeministri Benjamin Netanjahu dëshironte të ushtronte presion ndaj Hezbollahut për t'i dhënë fund sulmeve të tij ndërkufitare edhe pa një marrëveshje armëpushimi në Gaza, e cila ishte një parakusht për grupin militant pro-iranian.

"Unë mendoj se strategjia e Izraelit është e qartë: Izraeli dëshiron që gradualisht të ushtrojë presion mbi Hezbollahun dhe të sulmojë gjithnjë e më fort, për ta detyruar atë të rishqyrtojë strategjinë e tij të rakordimit në lidhje me Gazën", tha Horovic. Të dyja palët i kuptojnë rreziqet e luftës së gjithanshme, që do të thotë se nuk është e pamundur, tha ai.

Izraeli dhe Hezbollahu zhvilluan luftë për 34 ditë në verën e vitit 2006. Në liban humbën jetën më shumë se 1200 njerëz, kryesisht civilë dhe rreth 160 ushtarë izraelitë. "Kjo është një situatë jashtëzakonisht e rrezikshme, por unë mendoj se ka ende hapësirë për diplomacinë për të shmangur më të keqen" tha Horovic.

Kolonelja e pensionuar Miri Ajzen, një bashkëpunëtor i lartë në Institutin Ndërkombëtar të Izraelit kundër Terrorizmit të Universitetit Rajhman, tha se udhëheqja e Izraelit i sheh

operacionet ushtarake të përforcuara kundër Hezbollahut si një hap kyç drejt arritjes së çdo marrëveshjeje për të de-përshkallëzuar konfliktin.

“Gjuha që flet (Hezbollahu) është gjuha e dhunës dhe pushtetit dhe kjo nënkupton se aksionet kundër tyre janë shumë të rëndësishme”, tha ajo. “Do të doja të ishte ndryshe. Por nuk kam parë asnjë gjuhë tjetër që funksionon”, shton ajo.

Zyrtarët izraelitë thonë se për momentin janë të fokusuar në operacionet ajrore, por Ajzen tha se mund të urdhërohet një sulm tokësor për të arritur qëllimin më të gjerë për të siguruar që Hezbollahu të mos kryejë asgjë si sulmi i 7 tetorit nga Hamasi. "Unë mendoj se ka një mundësi të një inkursioni tokësor sepse përfundimisht ne duhet t'i largojmë forcat e Hezbollahut larg kufirit," tha ajo.

Libani

Pas një sulmi ndaj pajisjeve të komunikimit të Hezbollahut dhe një sulmi ajror në selinë e forcave të tij elitare Raduan javën e kaluar, nënkryetari i grupit, Naim Qasim, tha se beteja me Izraelin kishte hyrë në një "fazë të re të konfrontimit të hapur". Ministria e shëndetësisë e Libanit tha se rreth 500 njerëz u vranë të hënën në ditën më vdekjeprurëse të konfliktit të vitit 2006.

Amal Saad, një studiuese libaneze e Hezbollahut në Universitetin e Kardifit, beson se grupi, edhe pse ka ndjerë nevojën për të goditur Izraelin pasi pësoi kaq shumë goditje, është përpjekur të kalibrojë reagimin e tij për të shmangur luftën e gjithanshme.

Edhe pse Hezbollahu i ka shtuar sulmet e tij ndaj Izraelit që kur komandanti i tij ushtarak Fuad Shukr u vra në një sulm izraelit në Bejrut në fund të korrikut, përgjigja e tij mendohet të jetë e kalibruar me kujdes për të shmangur ndezjen e një konflikti më të gjerë. "Ky, përsëri, ka të ngjarë të jetë një lloj reagimi nën pragun e luftës - një përshkallëzim i kontrolluar, por që është gjithashtu cilësisht i ndryshëm," tha ajo.

Nëse lufta mund të shmanget, mund të mos jetë në duart e Hezbollahut, tha Saad, por shtoi se grupi mund të forcohet nga kujtimet e pushtimit të fundit tokësor të Izraelit dhe besimi se ai është ushtarakisht më i fortë se aleati i tij Hamasi, i cili po lufton me forcat izraelite Gaza për gati një vit.

“Është jashtëzakonisht i aftë dhe do të thosha më efektiv se Izraeli kur bëhet fjalë për luftën tokësore, ofensivën nëntokësore dhe këtë e kemi parë në histori, veçanërisht në vitin 2006”, tha ajo.

Shefi i Hezbollahut, Hasan Nasrallah, tha javën e kaluar se luftëtarët e tij mund të luftojnë forcat izraelite në Libanin jugor, ndërkohë që të hedhin raketa në veri të Izraelit në rast të një operacioni tokësor izraelit.

Grupi ndërkombëtar i krizës tha në një raport të lëshuar të hënën se përshkallëzimi midis dy palëve "paraqet rreziqe serioze". “Pika mund të jetë duke u afruar aty ku Hezbollahu vendos se vetëm një përgjigje masive mund të parandalojë Izraelin të nisë sulme të reja”, thuhet në raport.