Скопје, 16 август 2021 (МИА) - Целосно заврши изградбата на новите четири училници во рамките на основното училиште „Лазо Ангеловски“ во Ново Лисиче. Општина Аеродром информира дека станува збор за капитален проект кој опфати изградба на приземје и кат односно четири нови училници, хол, канцеларии и санитарни јазли, што се поврзани со веќе постојниот објект на училиштето. А, училниците се опремени со нови клупи, столчиња и друга потребна опрема за одржување современа настава. -Многу сум горд на овој проект затоа што изградбата на новите училници е од исклучителна важност за нашите ученици. Со изградбата не само што се прошири капацитетот на училиштето, туку се реши и деценискиот проблем, со што конечно се укинува третата смена во наставата, што беше еден голем проблем за овој дел од Аеродром, вели градоначалникот на Општина Аеродром, Златко Марин. Досега се реновираа сите основни училишта, а во тек е изградбата на целосно новиот објект на ООУ „Димитар Македонски“ во населбата Лисиче, со што учениците од овој дел на Аеродром ќе добијат современо училиште по цели шест децении.свс/са/