Трипуновски: Склучени се 967 договори за закуп на 2700 хектари државно земјоделско земјиште
- Министерот за земјоделство, шумарство и водостопанство Цветан Трипуновски денеска во општина Свети Николе додели 84 договори за закуп на земјоделско земјиште во државна сопственост со вкупна површина од околу 250 хектари, соопшти МЗШВ.
![Трипуновски: Склучени се 967 договори за закуп на 2700 хектари државно земјоделско земјиште](https://new.mia.mk/images/20240815132131_big_730x400_91.webp )
Скопје, 15 август 2024 (МИА) - Министерот за земјоделство, шумарство и водостопанство Цветан Трипуновски денеска во општина Свети Николе додели 84 договори за закуп на земјоделско земјиште во државна сопственост со вкупна површина од околу 250 хектари, соопшти МЗШВ.
Со овој настан, како што посочуваат, се означија успешно завршени четири јавни повици за давање во закуп на земјоделско земјиште во државна сопственост за површини дo три хектари.
По овие повици склучени се вкупно 967 договори за закуп на земјоделско земјиште во државна сопственост со вкупна површина од околу 2700 ха.
Во текот на денешниот ден овие 967 договори веќе се поделени по подрачните единици. Најголем број на договори има во подрачната единица Свети Николе, Прилеп, Куманово, а во останатите подрачни единици има помал број на договори.
- Со овој процес кој што го заокружуваме сега, даваме силен фокус и силен приоритет да земјоделското земјиште биде ставено во функција на земјоделците. Знаеме дека во минатото имаше селективност во распределбата, но тоа ќе биде веќе минато. Ние како одговорно министерство, како влада ќе работиме затоа што земјоделците се наш приоритет, изјави министерот Трипуновски.
Во почетокот на месец септември, МЗШВ ќе распише јавни повици за преостанатото слободно државно земјоделско земјиште се со цел да се распредели и да се стави во функција за земјоделско производство.
- Жалам што во минатото имало одредени злоупотреби кои што ние како Министерство ги констатиравме во изминатиот период. Меѓутоа нашата интенција е сето земјоделско земјиште да заврши кај вистинските земјоделци и да истото се стави во функција, да биде во процес на обработка односно на производство, појасни министерот Трипуновски.са/дма/
Фото: МЗШВ