Тошковски за патувањето на Гаши во Косово: Планот за патување е уредно најавен, не е целосно запазена процедурата на евидентирање на сите лица и патници
- Министерот за внатрешни работи Панче Тошковски денеска во врска со настанот поврзан со патувањето во Косово на претседателот на Собранието Африм Гаши, информираше дека планот за патување на Гаши е уредно најавен, но посочи оти е констатирано дека не е целосно запазена процедурата на евидентирање на сите лица и патници.
![Тошковски за патувањето на Гаши во Косово: Планот за патување е уредно најавен, не е целосно запазена процедурата на евидентирање на сите лица и патници](https://new.mia.mk/images/20240820141904_big_730x400_45.webp )
Скопје, 20 август 2024 (МИА) - Министерот за внатрешни работи Панче Тошковски денеска во врска со настанот поврзан со патувањето во Косово на претседателот на Собранието Африм Гаши, информираше дека планот за патување на Гаши е уредно најавен, но посочи оти е констатирано дека не е целосно запазена процедурата на евидентирање на сите лица и патници.
-Во врска со настанот поврзан со патувањето во Косово на претседателот на Собранието Африм Гаши, Министерството за внатрешни работи во последните три дена изврши интензивни проверки кои вклучуваат преглед на камерите на граничниот премин Блаце, увид во евиденција на системот за контрола на патници и возила и евиденција во книгите на настани и процедури на граничниот премин, објави Тошковски на својата Fејсбук страница.
Како што потенцираше, утврдено е дека планот за патување на претседателот Гаши е уредно најавен и заведен во евидентните книги по претходно известување од Министерството за надворешни работи од 16 август оваа година. Во известувањето покрај претседателот на Собрание, опфатени се и членовите на неговото семејство, членови на обезбедувањето и три полициски службени возила.
Тој појаснува дека граничниот премин на 18 август во период од 18:40 часот до 18:42 часот го поминале шест возила под полициска придружба од кои три полициски и едно ВИП возило.
-Праксата на работењето на граничниот премин во поглед на преземање на зајакнати мерки и активности за обезбедување на делегација, поради недоволен број на сообраќајни ленти, значи во моментот на поминување на делегацијата со цел обезбедување на простор без други возила, гранични проверки да се вршат со попуштен режим согласно со член 17 од Законот за гранична контрола, како што се одвивало и во овој случај и траело многу кратко време, додаде Тошковски.
Како што посочи, со извршените контроли во Системот за контрола на патници и возила утврдено е дека носителот на делегацијата, како и членовите на неговото семејство кои биле најавени дека ќе остварат излез, не се евидентираат во системот за контрола на патници и возила.
Исто така, појасни, констатирано е дека не е целосно запазена процедурата на евидентирање на сите лица и патници кои поминуваат на граничниот премин во системот за контрола на патници и возила.
Тошковски додаде дека за утврдените пропусти во работењето од страна на Регионалниот центар за гранични работи Север кон раководителот на смена на граничниот премин ќе бидат преземени соодветни мерки за утврдување на одговорност согласно Колективниот договор на МВР.
-Она што е важно и кон што се стреми Министерството за внатрешни работи е законите да важат за сите исто. За секоја активност која не е во рамки на пропишаните законски и работни процедури мора да има конкретна индивидуална одговорност. Навистина поминаа времињата кога беше нормално полициски службеник заштитен од корумпирана власт да се впушта во активности кои ги надминуваат неговите законски овластувања и обврски. Никој не е, и не може да биде над законот, додаде министерот.
Тој испрати апел до сите полициски службеници да работат согласно законите и правилата и да ја одбијат секоја незаконска наредба или непринципиелно барање од било кого. бт/ац/
Фото: МИА Архива