Женева, 5 ноември 2024 (МИА) - Светската здравствена организација денеска соопшти дека неделава е планирана голема медицинска евакуација од Газа, на повеќе од 100 тешко болни и повредени пациенти кои треба да ја напуштат територијата опустошена од војната.

СЗО соопшти дека заедно со своите партнери утре ќе евакуира дури 113 пациенти, при што повеќето ќе заминат во Обединетите Арапски Емирати, а некои ќе се упатат во Романија на специјализирана нега.

Ако продолжи, тоа ќе биде најголемата евакуација од Газа од октомври 2023 година, според податоците на здравствената агенција на ОН.

Рик Пиперкорн, претставник на СЗО на палестинските територии, рече дека се надева дека евакуацијата ќе продолжи.

Тој рече дека во моментов се прават напори да се донесат пациенти од различни болници низ Појасот Газа во Европската болница во Газа во близина на Кан Јунис на југот.

„Тие ќе бидат транспортирани до преминот Керем Шалом утре рано изутрина, а потоа ќе бидат пренесени во ОАЕ и Романија“, изјави Пиперкорн за новинарите во Женева, преку видео врска од Газа.

Тие кои се на списокот се меѓу 14.000 луѓе кои моментално чекаат во Газа да бидат евакуирани од територијата поради медицински причини. рп/

Фото: МИА архива