Лондон, 11 октомври 2024 (МИА) - Играчот од средниот ред на грчката репрезентација Димитриос Пелкас изјави дека Грција не сакала да го игра натпреварот од Лигата на нации со Англија по смртта на дефанзивецот на Панатинаикос, Џорџ Балдок, но бидејќи немало опција да се презакаже натпреварот, тие излегле на теренот за да победат во негово име.

Поранешниот дефанзивец на Шефилд Јунајтед, Балдок, почина на 31-годишна возраст откако се удави во својот базен во Атина. Балдок има 12 натпревари за Грција, последен пат беше вклучен во тимот за поразот од Грузија во баражот за ЕП 2024.

Грција на најдобар можен начин му оддаде почит на својот соиграч откако за прв пат ја победи Англија со 2-1 на „Вембли“, а Евангелос Павлидис го постигна победничкиот гол во судиското надополнување.

Пелкас, кој влезе од клупата, изјави дека Грците не сакаат да играат, но дека е невозможно да се одложи натпреварот бидејќи нема датум на календарот.

-Така е, правилата се направени, УЕФА нема друга опција да го презакаже овој натпревар, затоа игравме. Оваа победа е за него. Кога ќе се случат овие работи во животот, фудбалот е на последното место. Никогаш нема да го заборавиме, денес бев сигурен дека ќе биде со нас од небото и ќе слави со нас и ќе не натера да ја земеме оваа победа. Не сакам да зборувам за фудбал, вчера беше многу напорно за сите нас, не можевме да зборуваме, не можевме да се смееме, не можевме да јадеме во хотелот. Беше навистина тежок ден. Сакам да изразам сочувство до неговото семејство, за нив ова е најтешкото време, изјави Пелкас.дс

Фото: Принтскрин