Од верските календари
- 9 септември 2024 (МИА)
![Од верските календари](https://new.mia.mk/images/20240906094122_big_730x400_30.webp )
Од верските календари
9 септември 2024 (МИА)
Според календарот на МПЦ (Јулијанскиот календар) денеска е 27 август.
Денеска е Преподобен Пимен Велики.
Преподобен Пимен живееше во петтиот век. По род беше Египќанец. Монаштвото го засака уште како дете, па ги посетуваше големите старци и трудољубиво собираше од нив поуки, како што пчелата го собира медот од најубавите цветови. Подоцна се замонаши, а по него се замонашија и неговите двајца браќа. Манастирот на овие тројца браќа, со кои раководеше најстариот од нив авва Анубиј, го имаше следниов типик: ноќта ја поминуваа четири часа во ракоделие, четири часа во спиење и четири часа во псалмодија; од утрото до пладне времето го поминуваа наизменично во работа и молитва; од пладне до вечерната читаа, а потоа го јадеа единствениот оброк за 24 часа, што обично се состоеше од зелје. Секојдневно се смируваа еден пред друг. Така проживеа преподобниот Пимен до длабока старост и мирно се упокои во Господа.
ОД КАТОЛИЧКИОТ КАЛЕНДАР
Денеска е Св. Петар Клавер.
Бил роден во 1580 година во Шпанија. Во 1596 година го посетувал исусовското сеучилиште во Барселона. Во 1616 година станал свештеник и работел со црнците. Тој бил еден од најзначајните социјални работници и апостол на робовите во Колумбија. Им помагал на робовите кои биле измачувани. За него тие рекле: "Петар Клавер може да биде црнец бидејќи ниту еден белец никогаш нема да знае така да ги сака луѓето". Свети Петар Клавер умрел во 1654 година.
###