Лондон, 24 јануари 2023 (МИА) - Претседателот на Светската автомобилистичка федерација (ФИА), Мохамед бин Сулајем ги коментираше гласините за можни преговори за продажба на Формула 1.

-Како чувар на мотоспортот, ФИА е претпазлива од наводните 20 милијарди долари што се понудени за Формула 1. Секој потенцијален купувач е охрабрен да користи здрав разум, да размислува и да дејствува првенствено во интерес на спортот и да претстави јасен, одржлив план за акција. Не само да понуди многу пари. Наша должност е да размислуваме за такви работи. Какви ќе бидат последиците за промоторите на Гран при во однос на зголемените такси за трка, други комерцијални трошоци. Размислете за тоа какво би било негативно влијание што ова може да го има врз навивачите. Засега, сепак сето ова е само гласина. Но, исто така верувам дека ФИА треба да се вклучи во такви преговори - или барем да понуди совети, бидејќи самото првенство и припаѓа на ФИА, рече Бин Сулајем.

Неодамна медиумите објавија дека државниот фонд на Саудиска Арабија минатата година изразил желба да стекне сопственост врз Формула 1, нудејќи нешто повеќе од 20 милијарди долари за шампионатот. Во исто време, сегашните сопственици на Ф-1 од Либерти Медиа одбија да преговараат, со напомена дека серијата не е на продажба. зс/