Приштина, 11 април 2024 (МИА) - Безбедносните сили на Косово (БСК) денеска добија донација од Германија од пет воени камиони од компанијата „Рајнметал“ во вредност од 2,7 милиони евра, а најавено е дека ќе бидат купени уште десет такви возила за БСК.

Министерот за одбрана, Ејуп Маќедонци на приемот во касарната „Адем Јашари“ рече дека денеска е посебен ден за БСК бидејќи добиле донација од Германија која ќе влијае на зголемување на логистичките и оперативните капацитети.

Тој рече дека на патот кон растот и развојот на армијата, Германија како стратешки партнер одигра исклучителна улога и дека Приштина и е благодарна.

Според него, донацијата на воени камиони во износ од 2,7 милиони евра е продолжение на донацијата од 3,5 милиони евра што беше врачена минатата година.

„Одличната соработка ќе продолжи со цел да ги подигнеме нашите одбранбени капацитети на ниво на стандардите на НАТО, со цел да придонесеме за мирот и безбедноста во земјата, регионот и пошироко“, рече тој.

Германскиот амбасадор во Косово, Јорн Роде изјави дека донацијата од пет камиони од Германија ќе и помогне на БСК во областа на логистиката.

Според него, денешната донација ги потврдува одличните односи меѓу Германија и Косово. рп/

Фото: МИА архива