Париз, 27 март 2021 (МИА) - Франција има „тешка и огромна одговорност“ за геноцидот во Руанда во 1994 година, но нема докази дека Париз е соучесник во злосторството, се наведува во извештајот на француските историчари, што синоќа беше доставен до францускиот претседател Емануел Макрон.

Во извештајот се потенцира дека Франција била „слепа“ за подготовките за геноцид во Руанда. Најмалку 800.000 луѓе беа убиени кога екстремистите Хуту ги масакрираа припадниците на малцинството Тутси и умерените Хути во 1994 година.

Руанда веќе долго време ја обвинува Франција дека е соучесник во геноцидот.

Макрон извештајот го оцени како „важен чекор кон заедничко разбирање на улогата на Франција“ во Руанда и најави отворањее на две клучни архиви за геноцидот. Тој додаде дека ќе продолжат напорите за казнување на одговорните за злосторството, кои досега ја избегнаа правдата.

Поради историските врски меѓу Париз и режимот на претседателот на Руанда, Јувенал Хабијаримана, голем број лица осомничени за евентуално извршување злосторства побегнаа во Франција по 1994 година, а некои случаи добија и француско државјанство. ми/