Скопје, 15 јануари 2024 (МИА) - Вицепремиерката задолжена за политики за добро владеење Славица Грковска, денеска одржала онлајн средба со Кларенс Сидорф, глобален амбасадор на УЕФА за диверзитет. Сидорф е најуспешниот фудбалер во холандската историја и еден од шесте луѓе во светот, кои Нелсон Мандела ги избрал како „шампиони на наследството“.

Како што соопшти владината прес-служба, Грковска и Сидорф се согласиле дека споделуваат заедничка визија и заложби насочени кон позитивни социјални промени и дека преку спортот се шират благородни вредности и идеи, кои имаат особено значаен ефект кај младата популација.

-Имајќи го предвид глобалниот активизам на познатиот холандски фудбалер, таа упати покана до него да ја посети Северна Македонија во наредниот период, оценувајќи дека неговата посветеност и ентузијазам за промоција на вредности и инклузивност во општеството ќе има значаен одек и позитивен придонес во земјата и во целиот регион, се наведува во соопштението.

На состанокот се разговарало за можностите за заедничка соработка околу справување со корупцијата во спортот, како и за активности преку кои се отвораат можности за спортување на сите, особено за децата со попреченост.

Вицепремиерката Грковска го информирала Сидорф за активностите кои нејзиниот кабинет ги презема во изминатиов период, вклучително и за адресирање на проблемот со корупцијата во спортот во домашната легислатива. Таа се осврнала и на потребата за подигнување на јавната свест за адаптирање на спортските објекти во земјата, во насока на овозможување спортски активности за лицата и децата со попреченост.

Кларенс Сидорф стана познат глобален активист по завршувањето на неговата кариера како фудбалер и го користи влијанието на спортот за промоција на позитивни општествени промени и создавање подобар свет, преку неговата Фондација „Шампиони за децата“, основана во 2004 година. дма/са/

Фото: Влада на РСМ