Софија, 11 февруари 2026 – Бројот на жени кои работат како научници и инженери во Европската Унија се зголеми во 2024 година. Бугарија е меѓу земјите-членки со најголем удел на жени во овие професии, објави Евростат.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Во 2008 година, 3,4 милиони жени во ЕУ биле вработени во овие професии, достигнувајќи 5,2 милиони во 2014 година и 7,9 милиони во 2024 година.

Жените сочинувале 40,5 проценти од работната сила меѓу научниците и инженерите во сите економски сектори во ЕУ во 2024 година. Овој удел бил поголем во услугите за интензивно знаење (45,1 процент) и услугите (45 проценти). Во производството, жените сочинувале 22,4 проценти од научниците и инженерите.

Меѓу земјите од ЕУ, уделот на жени научници и инженери значително варира во 2024 година, при што највисоките удели се регистрирани во Летонија (50,9 проценти), Данска (48,8), Естонија (47,9), Шпанија (47,6) и Бугарија и Ирска (47,3 отсто). Жените научници и инженери се најмалку застапени во Финска (30,7 проценти), Унгарија (31,7), Луксембург (32,4), Словачка (33,6) и Германија (34,6 отсто).

На ниво 1 од Номенклатурата на територијални единици за статистички цели, жените научници и инженери се мнозинство во 11 региони на ЕУ: четири региони во Шпанија – Канарски Острови (58,8 проценти), централна Шпанија (52,5), североисточна Шпанија (52,4) и Јужна Шпанија (50,3 проценти), две региона во Португалија – Азорски Острови (57,3 проценти) и Мадеира (56,4 отсто), централниот макрорегион (54,8 проценти) и и макрорегион (54 проценти) во Полска, северните и југоисточните региони во Бугарија (53,3 проценти), северна Шведска (52 проценти) и Летонија (50,9 проценти).

Најнизок процент на жени научници и инженери е забележан во Централниот регион на Унгарија (30 проценти), континентална Финска (30,7 проценти), Јужниот регион во Италија (31,1 процент) и германските региони Рајнска област-Пфалц (31,3 проценти), Баден-Виртемберг (31,7 проценти) и Хесен (32,3 проценти).

Денеска се одбележува 11-тиот Меѓународен ден на жените и девојките во науката, потсетува Евростат.

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.