Софија, 1 февруари 2026 (МИА/БТА) - Четвртата група антарктички истражувачи за сезонава, предводена од раководителот на бугарските антарктички експедиции, проф. Христо Пимпирев, беше пречекана со погача и мед во бугарската база „Св. Климент Охридски“ на островот Ливингстон.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Групата беше транспортирана од бугарскиот научно-истражувачки брод „Св. св. Кирил и Методиј“ со чамци.

Во групата се раководителот на бугарските антарктички експедиции проф. Христо Пимпирев, флотилен адмирал Бојан Медникаров и кап. I ранг проф. Мирослав Цветков, како и научниците вон. проф. Стојан Георгиев од Геолошкиот институт при БАН, гл. асистент д-р Снежана Русинова-Видева од Институтот за микробиологија при БАН, гл. асистент д-р Гергана Георгиева од Физичкиот факултет при Софискиот универзитет „Св. Климент Охридски“ и проф. Емил Станев од Германија. Во бугарската антарктичка експедиција оваа година се вклучуваат и грчките научници Дионисија Ригату од Атинскиот универзитет и Елени Китину од Институтот за океанографија при Грчкиот центар за морски истражувања.

Во групата се и специјалниот кореспондент на БТА, Симона-Алекс Михалева, новинарот Живко Константинов, новинарката Марија Чернева, операторката Ана Андреева, биотехничарот Кирил Кандиларов и писателот Васил Попов. Групата отпатува од Софија на 24 јануари.

Како што соопшти БТА, по отворањето на бугарската антарктичка база „Св. Климент Охридски“ на островот Ливингстон во средината на ноември, започна суштинската работа на 34-тата научна експедиција. Во реонот на Јужниот Залив на островот Ливингстон, меѓународниот тим научници, со помош на логистичкиот тим од експедицијата, собира примероци за неколку научни проекти.

Бугарскиот научно-истражувачки брод „Св. св. Кирил и Методиј“ (НИК 421) исплови за Ледениот континент на 7 ноември од Варна. Пловилото пристигна во воената база на аргентинскиот град Мар дел Плата на 13 декември 2025 година, по едномесечно пловење низ Атлантскиот Океан.

За време на тековната поларна експедиција и четвртото пловење со научно-истражувачкиот брод „Св. св. Кирил и Методиј“, ќе стапнеме и на Антарктичкиот Полуостров, изјави на 7 ноември во Варна проф. Христо Пимпирев при испраќањето на НИК 421 на новото патување.

БТА има национален прес-клуб на бродот НИК 421 од 2022 година. Во февруари 2024 година, националната информативна агенција на Бугарија отвори таков и во бугарската антарктичка база „Св. Климент Охридски“ на островот Ливингстон. Генералниот директор на БТА, Кирил Валчев, пред четвртото патување до Антарктикот на НИК 421 на 7 ноември минатата година соопшти дека националната агенција ќе испрати свој специјален кореспондент во јануари-февруари 2026 година.

Материјалите на специјалните кореспонденти на БТА од НИК 421 и од Антарктикот се со слободен пристап во специјалната тематска рубрика „Бродски дневник на БТА“ на бугарски и англиски јазик и можат слободно да се користат од сите медиуми со повикување на БТА.

_____________________________________________________________________________________

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА.