Брисел, 3 февруари 2020 (МИА) – Со истапувањето на Обединетото Кралство од Европската Унија на 31 јануари годинава, ЕУ нема ниедна земја членка во која англискиот е официјален јазик, но тоа нема да ги смени правилата во институциите на ЕУ за сега, јави дописничката на МИА од Брисел.

Ова денеска на редовната прес-конференција на Европската Комисија го потврди портпаролот Ерик Мамер.

Тој рече дека јазичните правила на институциите на ЕУ остануваат исти бидејќи произлегуваат од регулатива на ЕУ, која може да ја модифицира Советот на ЕУ, но ова за сега не е предвидено.

Регулативата на ЕУ за работните и официјалните јазици на употреба во институциите се дополнува со секое ново проширување на ЕУ. Сите јазици на земјите членки се официјални јазици за институциите, но работните јазици се англискиот и францускиот.

Дневните прес конференции во Европската Комисија се одржуваат на овие два јазика, додека пак Колеџот на еврокомесари работи на овие два јазика плус германскиот. Доколку некоја специфична земја членка е засегната од одредена дискусија се додава и нејзиниот јазик во усната процедура.

- Ниту една промена не е предвидена и ќе продолжиме со задоволство да говориме на англиски и француски во оваа прес-сала, како и на сите други јазици за време на работните состаноци, изјави Мамер. тм/