Banja Llukë, 23 dhjetor 2024 (MIA) - Rreth 200.000 shtëpi në pjesën veriperëndimore të Bosnjë e Hercegovinës (BeH) sot kanë mbetur pa energji elektrike për shkak të defekteve të shkaktuara nga reshjet e mëdha të borës, njoftuan kompanitë elektroenergjetike të dy entiteteve.

Ndërmarrja elektrike e BeH nga Federata e BeH njoftoi se nga ora 04:00 deri në 10:30, rreth 180.000 konsumatorë kanë mbetur pa energji elektrike.

"Falë ndërhyrjeve të shpejta të ekipeve të instalimeve elektrike, shumica e defekteve janë riparuar dhe aktualisht rreth 60.000 konsumatorë janë pa energji elektrike", njoftoi Ndërmarrja elektrike BeH.

Sipas kompanisë, situata është më e vështirë në Kantonin Una-Sana, gjegjësisht në Bihaq, Bosanska Krupa, Çazin, Sanski Most dhe Velika Kladusha.

Ndërmarrja elektrike nga Republika Serbe njoftoi se reshjet e borës kanë shkaktuar dështime në më shumë se 50 linja transmetimi të tensionit të mesëm në zonën e shpërndarjes së kompanisë.

Ndërprerja e energjisë elektrike është shkaktuar nga rënia e degëve dhe pemëve në shtylla, si dhe nga thyerja e telave nën peshën e borës, thuhet në komunikatë. mb/

Foto: MIA