Скопје, 13 октомври 2023 (МИА) - Обвинителството не импровизира, туку работи по план, програма и насоки. Во овој случај е ангажиран целиот истражен центар и никој не може да бара обвинение за 20 или 30 дена. Запленета е обемна писмена и електронска документација која бара експерти за утврдување факти. Ние тука можеме врз основа на трагедијата на луѓето да бараме публицитет или гласови. Но, извинете, јас се оградувам од тоа и не сум ви соговорник во таква работа. Оставете на мир, професионално да го работиме предметот, а кој рекол и што кажал, во ходници може да се зборува, надвор од оваа сала, рече попладнево државниот јавен обвинител Љубомир Јовески за „Онкологија“.

Како што објасни Јовески пред собраниската Комисија за финансирање и буџет, откако претходно членовите-пратеници од опозицијата обвинија дека не се постапува соодветно и побараа одговорност, предметот во континуитет се работи, а прашањата не се истражуваат посебно, туку во целост. Се испитува, истакна Јовески, дали постои организирана шема на дејствување која овозможувала злоупотреби - извлекување средства или несоодветно лекување. Се сослушуваат и сведоци, па со компарирање на сите податоци Обвинителството треба да дојде до оценка кој какви дејства презел, дали постои поделба на улогите во извршувањето на работата, дали набавките биле законски и по процедура. 

Јовески потенцира дека нема намера никого да шити и ги увери пратениците дека случајот ќе биде истражен до крај. Не е потребно само обвиниение, подвлече Јовески, туку треба да се утврди материјалната вистина, да се обезбедат докази што навистина се случувало и да се врати довербата на луѓето во здравствениот систем.

-Ве уверувам дека сите прашања ќе бидат до крај истражени, но не како делови. Тие мора да се вклопат во целина за да се извлече оценка за вкупниот настан и за улогата на сите лица кои евентуално го прекршиле законот. Нам не ни треба само обвинение, туку ни треба да ја утврдиме материјалната вистина, да обезбдиме докази што навистина се случувало и да ја вратиме довербата на луѓето во здравствениот систем. Немам намера никого да штитам. Цел живот сум го посветил на професијата и не сакам на крајот сиот мој вложен труд да го доведам во прашање. Битно е моето чувство дека работам согласно прописи и закон и сакам тој што направил кривично дело за дејства што се кривично дело да одговара. Кој и да е во прашање, Обвинителството ќе преземе или презема соодвети дејства. Секој што направил кривично дело или што презел дејства кои имаат елементи на кривично дело, бидете уверени дека содветно ќе одговара, подвлече Јовески.

Тој неколку пати повтори дека констатираните неправилности за работата на Клиниката за онкологија во ревизорскиот извештај не се предмет на оценка на Јавното обвинителство (ЈО). Предмет на оценка на ЈО, потенцира Јовески, се дејствата во кои има кривично дело и сторител на кривично дело.

-Ние не се занимаваме со тоа кој како набавувал, дали набавувал, дали била целта на набавува. Да го расчистиме случајот „Онкологија“ до крај во интерес на јавноста, пациентите, болните, нивните семејства и во интерес на докторската фела. Ве уверувам дека ќе работам на тоа, дополни Јовески.

Обидувајќи се да им објасни на пратениците од опозицијата која е надлежноста на Обвинителството, Јовески укажа и дека не секое трошење пари или секоја неправилност е кривично дело и дека за таквите случаи, повторно, не е надлежно ЈО. За тоа, нагласи, постојат други институции во државата кои се овластени да казнуваат или да менуваат закони. 

Според Јовески, премногу е сериозна ситуацијата околу „Онкологија“ за да базира на шпекулации. Во овој момент, информира, се водат повеќе предмети за настани во Клиниката за онкологија за разлика од порано кога биле, како што рече, отфрлани и кога биле донесени решенија дека нема кривични дела.

Во текот на дискусијата, Јовески и предложи на Комисијата да се огради од дискусијата на пратеникот Драган Ковачки од ВМРО-ДПМНЕ кој, како што укажа обвинителот, посочи имиња на обвинети лица. Тоа, потенцира Јовески, е притисок врз Обвинителството, предметот и обвинителите. Во овој контекст, напомена и дека е недозволиво пратеник да има разговори со инспектори од МВР, а доколку, пак, знае нешто повеќе, е должен сознанијата да го пријави во ЈО или кај надлежниот обвинител кој го води конкретниот предмет. 

-Ве молам да ја обезбедите самостојноста на ЈО и на обвинителите во постапувањето по конкретниот предмет, истакна Јовески.

На тоа претседателот на Комисијата Бојан Стојановски одговори дена никој од никого нема да се огради зашто правото на говор во Собранието е неприкосновено, дадено и во Уставот и во Деловникот. 

Ковачки претходно го обвини Јовески за манипулирање на јавноста зашто, како што напомена, 45 дена нема јавно-обвинителен акт за „Онкологија“, а главната обвинителка подолго време не е во државата. Неговиот сопартиец Петар Ристески, пак, праша за колку од доставените 22 материјала до ЈО од Државниот завиод за ревизија има истрага и дали е постапено каде што има и повреда на законот.

-Пратеникот во прашањето вели дека имало констатирани неправилности и прекршувања на законите, но тие не се кривични дела. Постојат прекрошоци, но за нив има соодветни органи. Веројатно во овој дел е проблемот меѓу моето одговорање на прашањата и тоа што тој го изложува. Ја ценам вашата заложба да се дојде до вистината, но очигледно не се разбравме. Точно е дека се констатирани неправилности во извештајот, но сите тие не претставуваат кривично дело. Обвинителството е надлежно за оние дејства во кои ќе утврди дека постои кривично дело и сторител на кривичното дело. Според тоа, ревизорскиот извештај ако има за задача да се гонат сторителите на кривични дела, ќе биде поинаку структуиран, рече Јовески, одговорајќи му на Ристески. мч/аа/

фото: МИА архива