Љубљана, 19 април 2024 (МИА) - Учесниците на состанокот организиран во Љубљана од Институтот на пријатели на Западен Балкан се залагаат за проширување на ЕУ во земјите од регионот, но и укажаа на предизвиците со кои се соочува.

Поранешниот словенечки претседател Борут Пахор изјави дека нема подобра алтернатива за регионот од членството во Унијата.

„Нема подобра алтернатива за иднината на Западен Балкан од полноправното членство на сите земји од регионот во Европската Унија“, рече Борут Пахор, кој е и основач на Институтот Пријатели на Западен Балкан, организатор  на дводневната средба, јави СТА.

Пахор рече дека 2030 година е пресвртна точка кога земјите од регионот и ЕУ ќе треба да бидат подготвени за проширување.

И поранешните претседатели на Србија, Бугарија и Австрија се согласија дека иднината на земјите од Западен Балкан е во ЕУ.

Поранешната висока претставничка на ЕУ за надворешна политика и безбедност Кетрин Ештон рече дека регионот одамна требало да стане дел од ЕУ. Таа нагласи за многу предизвици на Западен Балкан, кои, според неа, можат да се решат.

Меѓу другото, Ештон ги истакна проблемите на младите кои го напуштаат регионот во потрага по подобри можности.

„Мораме да го решиме овој проблем. Мораме да обезбедиме подобри услови за младите во регионот“, нагласи таа.

На меѓународната конференција на тема Западен Балкан во ЕУ, што денеска и утре се одржува во Љубљана, ќе учествуваат триесетина говорници од 19 земји, меѓу кои има многу високи дипломати, поранешни претседатели и премиери. рп/

Фото: МИА архива