Скопје, 28 февруари 2025 (МИА) - Министерката за енергетика, рударство и минерални суровини, Сања Божиновска и државниот секретар Горан Јовановски денеска ја посетиле Општина Јегуновце.

Тековните и идните проекти поврзани со рударството и експлоатацијата на минерални суровини во регионот, се дел од темите на кои разговарале  Божиновска со градоначалникот на општина Јегуновце, Димитар Костадиноски.

- Општина Јегуновце, која е со површина од 176,93 км² и население од над 8.000 жители, е значаен центар за експлоатација на минерални суровини. Во рамките на општината, неколку компании поседуваат концесии за експлоатација на минерални суровини, издадени од Министерството за енергетика, рударство и минерални суровини. Овие концесии придонесуваат за локалниот економски развој и обезбедуваат значителни приходи во општинскиот буџет, соопштија од Министерството.

Божиновска и Костадиноски разговарале за важноста на одржливото управување со природните ресурси, почитувањето на еколошките стандарди и безбедносните протоколи при експлоатацијата. Исто така, било истакната потребата од транспарентност и соработка меѓу локалната самоуправа и концесионерите, со цел максимизирање на бенефитите за заедницата.

Министерството за енергетика, рударство и минерални суровини посочува дека останува посветено на поддршката на општините како Јегуновце, преку обезбедување на стручна помош и надзор во спроведувањето на законските обврски поврзани со рударството и експлоатацијата на минерални суровини.фф/лв/

Фото: Министерство за енергетика, рударство и минерални суровини