Њујорк, 15 септември 2022 (МИА) - Се подготвува резолуција што ќе му дозволи на украинскиот претседател Володимир Зеленски преку видеоговор да се обрати на Генералната дебата на Генералното собрание на Обединетите Нации во Њујорк следната недела. Шансите тој лично да се обрати, се помали. Но, неколку дипломати од Њујорк за ДПА велат дека се подготвува резолуција што ќе му дозволи на Зеленски да го одржи својот говор до светските лидери преку видео. Потребно е просто мнозинство во Генералното собрание за да може да се дозволи овој чекор, а гласањето можно е да се случи уште утре, додава ДПА. Кога Зеленски би учествувал лично на настанот, тоа би било првпат да отпатува во странство од почетокот на руската војна против Украина, но, сепак, тој и со ова најевено видеообраќање ќе добие голем простор и внимание. Особено што рускиот претседател Владимир Путин одлучи годинава да не присуствува на собирот. Москва ќе биде претставувана од рускиот министер за надворешни работи Сергеј Лавров. Генералната дебата во Њујорк почнува во вторник, а се очекува во неа да учествуваат над 150 шефови на држави и влади, вклучувајќи ги американскиот претседател Џо Бајден, германскиот канцелар Олаф Шолц, претседателот на Франција, Емануел Макрон. бд/сд/