Братислава, 14 август 2024 (МИА) - Повеќе од десет илјади луѓе се собраа вчера во Братислава на протест против разрешувањето на раководителите на клучните културни институции во Словачка, за што одлучи министерката за култура, а што словачката опозиција го опиша како „чистка“, пренесе Бета.

Министерката Мартина Шимковичова ги разреши раководителите на истакнати културни институции, меѓу кои и директорите на Народниот театар и Националната галерија.

Нејзините одлуки набрзо доведоа до тоа опозицијата да ја обвини дека владее во страв и дека спроведува „чистки“ со цел да ја задуши уметничката слобода.

Според организаторите, околу 18.000 луѓе се собрале на главниот плоштад во Братислава и покрај жештините, многумина држеле плакати со пароли „Уметноста е бесплатна“ или „Не сакам коалиција без култура“.

Шимковичова припаѓа на десничарската националистичка партија СНС, дел од владејачката коалиција предводена од популистот Роберт Фицо, сега четврти премиер на Словачка.

Онлајн петицијата со која се бара оставка на Шимковичова собра 178.000 потписи за помалку од една недела. мс/

фото: ДПА