Велес,11 декември 2024 (МИА) - Во Велес синоќа беше промовирана првата збирка кратки раскази „Една ноќ друга“ со поднаслов „Исечоци катадневна магија“ на велешата авторка Даница И. Лепојевиќ која досега на јавноста и беше позната по своите стихозбирки.

 „Една ноќ друга“ е во издание на „Полица“, а промотори беа поетесата Соња Карбева и поетот Анде Јанков.

Според Јанков, Даница полека, но сигурно запловува во водите на еден уметнички правец што допрва треба да пристигне на сцена и во светски рамки, а во Македонија ретко кој и има слушнато за него.

Авторката и преведувачка Ирена Јурчева во книгата ќе напише: „во расказите преовладува меѓупросторот, пресекот на јавето и сонот“. 

- Атмосферата е често онирична, и во неа се претопуваат фантастичното и секојдневното. Во расказите, стихијата на водата е очигледната нишка што ги поврзува мотивите плодноста, креативноста, емотивната благосостојба, обновувањето, прочистувањето, движењето, промената, флуидноста, растот и трансформацијата. Како животодавна, но и животограбна стихија, со мајчински, но и одмазднички карактер, наведува Јурчева.

Професорката и проучувачка на книжевноста Мерсиха Исмајлоска, за зборовите во оваа книга пишува дека „се диктирани од љубовта, а процепите до неа се автентични за ова писмо, женско, но не само такво, писмо на човек што споделува драгоцено искуство, за оностраното, превртувајќи ги нештата од внатре – надвор“.

Авторката Лепојевиќ во предговорот за женската протагонистка на оваа збирка појаснува дека „минува низ различни возрасни фази додека напредува на своето патување и, притоа, не ги мине по вообичаениот линеарен временски тек“.

Ова е прва соработка на Даница со илустраторката Александра Иванова која ги создаде магичните цртежи низ расказите. И втора со фотографката Ана Трајановска Срока која ја направи фотката за кориците и на оваа книга на Даница. ад/мч/