Дебар, 10 јуни 2025 (МИА) - Претседателот на Сојузот на Македонците со исламска религија (СМИР), Љатиф Пајкоски остварил средба со Наташа Котлар, директорка на Државниот архив.

-Остварив многу конструктивна и корисна средба со директорката на Државниот архив на Македонија, професорката Наташа Котлар. Се согласивме дека овој дел на македонскиот народ претставува важен фактор во зачувување и негување на македонскиот јазик, култура, традиција и обичаи, објави Пајкоски на Фејсбук.

Додава дека било констатирано дека загрижувачки се процесите на масовно иселување, со оставање на празни села, особено во реканско-дебарскиот регион, како и струшки Дримкол.

-Веруваме дека институциите во периодот кој претстои ќе покажат поголем интерес и за ова население, но  за регионите во кои живее, наведува тој.

Пајкоски, кој е со постојано живеалиште во долнореканското село Жировница, неодамна имаше средба и со директорот на Агенцијата за иселеништво, Горан Ангелов.

Меѓу другото на оваа средба размениле мислења за теми кои значат вклучување на иселениците од реканско-дебарскиот регион во програмските активности на Агенцијата, како и на иселениците во Република Турција.

Била истакната важноста, во текот на летниот период, да се организира средба во реканскиот крај со претставниците на иселеничките организации по потекло од Река, а се согласиле е потребно да се работи на зајакнување на врските со Македонците кои живеат во Република Турција. вт/сст/

Фото: Пајкоски ФБ