Одбележан патронот на манастирот „Света Марина“ во Туминец, Мала Преспа
- Во селото Туминец, Мала Преспа, одбележан е патронот на манастирот „Светата Марена“, празник кој Македонците во Мала Преспа, традиционално го слават заедно и каде и да се иселени тие за овој
![Одбележан патронот на манастирот „Света Марина“ во Туминец, Мала Преспа](https://new.mia.mk/images/20221113190924_big_730x400_97.webp )
Пустец, 30 јули 2022 (МИА) – Во селото Туминец, Мала Преспа, одбележан е патронот на манастирот „Светата Марена“, празник кој Македонците во Мала Преспа, традиционално го слават заедно и каде и да се иселени тие за овој празник се тука.
По повод денешниот празник посветен на Света великомаченица Марина – Марена - Огнена Марија, како и изминатите години, одбележувањето почна од синоќа кога во дворот на манастирот до доцна во ноќта се виеше македонско оро и се пееја македонски песни.
По денешната богослужба што ја одржаа свештениците Алексо Темелко и Ропи Арѓири и двајцата Македонци од Мала Преспа, верниците продолжија со одбележувањето.
Од негово и од име на Македонска алијанса за европска интеграција празникот го честиташе партискиот лидер Васил Стерјовски.
- Честит и вековит да ни е денешниот ден посветен на Света Марена, да ни е на помош и да ни дарува здравје, многу радост, среќа, благосостојба, стои во кусата честитка.
Честитка за празникот, со истите желби, до жителите на Мала Преспа испрати и Никола Ѓурѓај, претседател на македонското друштво „Илинден“-Тирана.
Инаку, селото Туминец е едно од деветте населени места во Мала Преспа. Се наоѓа на самиот брег на Преспанското Езеро во близина на граничниот премин Стење - Горица и е второ село по големина, со околу 800 жители.
Овој преубав манастирот датира од 18 век, а обновен е во 1926 година. Се наоѓа на самиот брег од Преспанското Езеро, покрај местото наречено Писан Камен, локација која самата по себе му дава дополнителна убавина и привлечност. Во него се наоѓаат поголем дел од моштите на Светицата каде сè уште се случуваат чуда над нејзините мошти. вт/aa/
![Туминец](/articles/images/%d0%be%d0%b4%d0%b1%d0%b5%d0%bb%d0%b5%d0%b6%d0%b0%d0%bd-%d0%bf%d0%b0%d1/i3q7qVTSX/placeholder.webp?use_watermark=0)