Нов напад со нож во Германија: шест лица се повредени, тројца критично
- Најмалку шест лица се повредени, од кои три се во критична состојба, во напад со нож во автобус во западниот германски град Зиген. Осомничена за синоќешниот напад е 32-годишна жена.
![Нов напад со нож во Германија: шест лица се повредени, тројца критично](https://new.mia.mk/images/20240831083945_big_730x400_45.webp )
Берлин, 31 август 2024 (МИА) - Најмалку шест лица се повредени, од кои три се во критична состојба, во напад со нож во автобус во западниот германски град Зиген, пренесува ДПА.
Осомничена за синоќешниот напад е 32-годишна жена.
Германската полиција соопшти дека најмалку 40 луѓе се наоѓале во автобусот кој патувал на градскиот фестивал во Зиген, кој се наоѓа на околу 75 километри источно од Келн, кога се случил нападот околу 19:40 часот.
Неколку патници ја алармирале полицијата, а полицајците ја уапсиле осомничената, германска државјанка.
Мотивот на злосторството засега е непознат. Полицијата соопшти дека нема индикации за терористички напад.
Инцидентот се случи точно една недела по нападот со нож во западниот германски град Солинген, каде што беа убиени три, а повреди осум лица.
За нападот во Солинген е осомничен 26-годишен сириски државјанин, кој е во притвор. Одговорноста за нападот ја презеде терористичката група Исламска држава, иако германските власти се уште ја истражуваат веродостојноста на тврдењето.
Полицијата во Зиген ги повика граѓаните да не шират лажни вести на социјалните мрежи или други канали, а особено да не го поврзуваат инцидентот со терористички напад.са/
Фото: ЕПА