Делчево, 7 октомври 2022 (МИА) - Во Делчево се одржа завршен настан од проектот „Работа со ромскиот културно едукативен центар Тернипе МК“. Настанот заврши со богата културно-уметничка програма во којa, како што истакна кореографот Зенил Реџепов беа опфатени повеќе сегменти од самиот проект. -Во рамки на завршниот настан имавме интересни моменти и сегменти за оваа културно-уметничка програма како презентација на народни носии, народни инстументи карактеристични за нашето поднебје, презентација на млади музички таленти итн. Меѓу другото доделивме пофалници, благодарници и плакети наменети за сите стручни лица кои работеа, за учесниците, овде се поканети сите учесници, партнерските организации, покровителите и огромна благодарност до Министерството за култура кое ги поддржа сите активности на невладината Тернипе МК, рече Реџепов. Соња Мавордиева Георгиевска, претседател на Културно-уметничкото друштво  „Гоце Делчев“ кој беше активен учесник во проектот истакна дека соработката со „Тернипе МК“ ќе продолжи и во иднина. -Знаете дека заеднички споделуваме многу работилници, многу проекти, во интерес на споделување и зачувување на македонската култура и традиција, народните обичаи и верувања што се на нашето поднебје. Така градиме еден убав соживот, кој трае со години и се надевам ќе продолжи. Општина Делчево нека биде пример како треба да функционираме сите заедно и да ја зачувуваме нашата традиција, а Тернипе МК и КУД „Гоце Делчев“ ќе продолжат да сoработуваат и понатаму, рече Мавродиева Георгиевска. Тернипе МК проектот го реализира во соработка со КУД „Гоце Делчев“ Делчево и Општина Делчево со поддршка од Министерството за култура на Република Северна Македонија. вс/аа/